Analysar av plantemakrofossilar i jordprøver frå den arkeologiske utgravinga på Skeie gnr. 5, bnr. 10 og 36, Stavanger kommune, Rogaland i 1997 og 1998

Abstract

Det er samla inn i alt 603 jordprøver til makrofossilanalysar, 572 er flottert og 197 av prøvene er analysert. Jordprøvene er samla inn frå anlegg både i husa og mellom husa: eldstad/kokegrop, stolpehol og kulturlag. Resultata av analysane av makrofossilar, 14C-dateringar og den arkeologiske utgravinga gjev saman med innsyn i utviklinga av busetnaden på Skeie, frå bronsealder til overgangen mellom mellomalder og etter-reformatorisk tid, kva plantemateriale som vart nytta og kva som kan ha vokse på Skeie. Det er påvist restar av matplanter i form av forkola korn (Cerealia), både bygg (Hordeum sp.) og havre (Avena sp.), viltveksande nytteplanter, mange typar ugras og trekol av mange treslag. Det er 14C-datert 35 prøver av trekol, forkola nøtteskal og forkola korn som er funne i jordprøvene.