Arkeologisk sjaktundersøking gjennom moderne vegbane etter førreformatorisk vegfar. Id 222522 innan kv 2235 Sundeveien, Nordre Sunde gnr. 41, Stavanger kommune, Rogaland

Abstract

I løpet av 2017 utførte Am, Uis to mindre arkeologiske undersøkingar i og ved Sundevegen (id 222522, kv 2235) på nordre Sunde gnr 41 i Stavanger kommune. 03.02.2017 deltok to arkeologar frå Am, UiS på ei synfaring til eit anleggsområde i og ved Sundevegen. Der vart to jordprofilar, som truleg viser anleggsspor frå høvevis eldre bruk av Sundevegen og av ein sideveg til denne, reinsa fram, dokumentert, og prøveteke. Dette var i Am, Uis sin eigen regi og vart ikkje fakturert som ein kostnad til ein ekstern oppdragsgjevar. 28.08.2017 gjennomførte Am, Uis, med SVV Norsk vegmuseum som samarbeidspartnar og oppdragsgjevar, ei avgrensa arkeologisk undersøking i sjølve vegbana i Sundevegen (id 222522). Det vart grave to små sjakter gjennom den moderne vegen, med det føremål å leite etter liknande spor etter eldre vegfar her (vikingtid/mellomalder) som var påvist under ei sjaktundersøking i 2015 (id 216998). Resultata av synfaringa og sjaktundersøkinga i 2017 syner til saman at det finst spor i Sundevegen som er truverdige restar etter eldre vegfar her på staden, både nord og sør om id 216998. Desse spora er tolka til å kunne være frå heilt tilbake til førreformatorisk tid, og såleis kunne knytast til både den historisk kjende ride- og kyrkjevegen og endå eldre ferdsel i området. Ei karbondatering frå sjakt nord om tunet på garden Nord Sunde er karbondatert til mellomalder (1300-talet).