Korleis overleva Survivor Syndrome

Abstract

Bakgrunn: Nedbemanningsprosessar er ein stadig aukande del av organisasjonar i dag. Slike prosessar er vanskelege først og fremst for dei som mister jobben, men òg for dei som blir igjen. Problemstillinga for oppgåva omfattar korleis leiarar kan hjelpa medarbeidarar med å handtera survivor syndrome. I arbeidet med oppgåva har eg sett på korleis medarbeidarane som ikkje mister, jobben reagerer på nedbemanning. Temaet, å forstå korleis overlevarane reagerer, diskuterer eg med utgangspunkt i teori om Survivor Syndrome, sett opp mot Elisabeth Kübler Ross si klassiske endringskurve.

Metode: Sidan eg undersøker korleis medarbeidarar reagerer på å overleva nedbemanning, tek oppgåva utgangspunkt i psykologisk fenomenologi. Eg har brukt abduktiv metode der målet har vore å nybeskriva teoretiske samanhengar om Survivor Syndrome. Casen i studiet er ei verksemd som leverer til offshorebransjen, som har gjennomført fleire nedbemanningar dei siste åra. Eg har brukt ein casestudie sidan eg har undersøkt eit noverande fenomen i djupna, og i sin verkelege kontekst. Datamaterialet består av intervju med elleve leiararar og medarbeidarar som har opplevd fleire nedbemanningar, og eg har brukt aktive samtalebaserte intervju for å få tak i gode beskrivingar frå informantane. Eg har intervjua med mål om å få tilgang til informantane sine erfaringar med å overleva nedbemanningsprosessar. Målet har ikkje vore å finna eit endeleg svar, men å bidra til forståinga av korleis ein bør leia nedbemanningsprosessar.

Resultat: Basert på funna i studien lanserer eg omgrepet reaktive arr. Medarbeidarar handterer det å oppleva nedbemanningsprosessar forskjellig, og sjølv om dei ikkje mister jobben, kan dei få reaktive arr ved å overleva gjentekne nedbemanningar. Eg fann fire hovudtypar overlevarar med fire ulike djupner i dei reaktive arra. Ein sentral implikasjon av mine funn er at leiarar må tilpassa måten dei handterer ulike medarbeidarar på. Leiing tilpassa dei ulike overlevarane sine behov, kan bidra til å førebygga, og dempa dei reaktive arra.